Datum:
Samschtig 09. Dezember 2023

Zeit:
13:30 Uhr

Jass:
Verdecktä Differänzler

Chartä:
Düütsch  

Startgeld:
Fr. 30.00

NEU mit Teamwärtig

I dem Jahr gid's nüü ä Teamwärtig. Chum mid Dinä Kollegä is Ybrig gu jassä und gwinnid ä spannendä Tagesusflug für s'ganzä Team! Bidä Teamwärtig chönd au diä gwinnä, wo sich sälber nid als beschti Jasser gsend. Äs gilt als Plauschkategorie, isch gratis und lauft folgendermassä ab:

- Äs Team bestaad us mindistens 4 bis maximal 8 Teilnähmer.

- Vorem Jassä schätzt Üches Team diä durchschnittlich Differänz vo Ücherä Gruppä.

- Äs gwinnt das Team, weles Iri durchschnittlich Differänz am genäustä schätzt.

- Jedes Team-Mitglied jassed ganz normal als Einzel-Jasser au am Jassturniär mit.

Turniärablauf

Am Namitag jassid all Teilnähmerinnä und Teilnähmer unteränand. Äs gid 4 Passä à
4 Jäss. Diä beschtä 3 Jasser vom Namitag qualifiziärid sich für diä 1. Finalrundi vom Abig, wos gägenä Telefonjasser um d'Wellnesspriisä spielid. Damits nu wiiteri Spannig gid, wärded für diä 2. Finalrundi 3 zuäfälligi Finalgägner vom Telefonjasser unter allnä Teilnähmer usgloust. Jedä Wellnesspriis, wo d'Ybriger Telefonjasser idä Finalrundä für sich gwinnid, wird adä Rangverkündigung unter allnä awesendä Teilnähmer verlost.

Adrässi

Mehrzweckhaus Baumeli
Waagtalstrasse 26
8842 Unteriberg
(Rollstuhlfreundlich)

Idee hinterem Jassturniär

Im 15. Läbensjahr isch am Michael ä unheilbari Muskelkrankheit diagnostiziärt wordä, gnännt: "Gliedergürtelmuskeldystrophie vom Typ Dysferlinopathie 2b», darum isch dä Michael scho sid mehrerä Jahr ufä Rollstuäl agwisä. Wägä derä komplettä Läbensveränderig hed är äs nüüs Hobby entdeckt; s'Jassä.

Inzwüschä hed dä Michael zämä mit siinä Kollegä i üsem Heimatdorf Unteriberg 3 chlineri Jassturniär für zirka 40 Personä organisiärt. Dä Namä "Träff-Jassturniär" leitet sich vom Verastaltigsort ab, dem Restaurant vo sim Mammi; Moni's Träff.

S'Träff-Jassturniär isch jedes Jahr ä vollä Erfolg gsi. Öb jung oder alt, alli Jasserinnä und Jasser hend ä diänigä und gmüätlichä Jassnamitag chönnä verbringä. 

Wils so vieli positivi Rückmäldigä vodä Teilnähmer gäh hed, hed sich dä Michael entschlossä, zämä mid sinä huffä Jasskollegä äs grosses Jassturniär z'organisiärä.

Üses Ziel isches, über Jahre z'gröischtä Differänzler-Jassturniär wo für Jasserinnä und Jasser us dä ganzä Schiiz z'erreichä isch ufbuuä. Dadäbii staad dä Plausch im Vordergrund, was gids scho schöners als ä gmüätlichä und unterhaltsamä Jassnamitag mid paar fridlichä Lüüt chönnä z'verbringä? Und wänns dä gmüätlich und lustig wird darf natürli chli Musig au nid fählä. Darum wird Üch z'Ländlertrio KÜWY nach dä Rangverkündigung nu musikalisch unterhaltä. Au ä Barbetrieb isch vorhandä.